இறைபோதை

ஒளித்திருக்கும் இருளினை உன் ஒளி கொண்டு மறைப்பேனோ
உறைந்திருக்கும் மனதினை உன்கருணை கொண்டு கறைப்பேனோ
உள்ளிருக்கும் அசுரர்களை உன்பலம் கொண்டு அழிப்பேனோ
மாறாக முன்னிருக்கும் உலகை இறைபோதை கொண்டு  மறப்பேனோ

அன்பு கருணை மறந்து இங்கு ஆடவைக்கும் இறைபோதை
அண்டிவரும் உயிர்களையும் அழிக்கவைக்கும் இறைபோதை
என்வழிதான் உயர்ந்ததென்று எண்ணவைக்கும் இறைபோதை
உன்னைமறந்து உன்பெயரால் உனையழிக்கும் இறைபோதை

மெய்யென்று பொய் சொல்லி ஊரை ஏய்க்கும் இறைபோதை
அமைதி அமைதி என்று சொல்லி இரைச்சலிடும் இறைபோதை
அன்பு அன்பு என்று சொல்லி மனிதம் அழிக்கும் இறைபோதை
உந்தன் வழி என்று சொல்லி நரகம் காட்டும் இறைபோதை

இதுவுமில்லை அது எதுவுமில்லை  என்று சொல்லும் இறைபோதை
எதை செய்தும் இறைந்தால்  போதும் என்று சொல்லும் இறைபோதை
உன் இன்னொரு முகத்தை  வெட்டிப்போடு என்று சொல்லும்  இறைபோதை
இறைபோதையிடமிருந்து என்னை காக்க இறைஞ்சுகிறேன் உன்னையே  

கலைந்த தவம்

ஒற்றைச் சொல்லிலே ஒடுக்குமொரு தவம்
ஓய்வின்றி நானும் செய்து வந்தேன்
பெரும் சிரிப்பால் என் தவம் கலைத்தாய்
பேரண்ட ரகசியங்கள் பல சொன்னாய்

மனக்காட்சி தேடி கண்மூடும் தவம்
மனதடக்க நானும் செய்து வந்தேன்
மின்னி கண்திறக்க என் தவம் கலைத்தாய்
மனதும் நிறையும் காட்சி தந்தாய்

மாயாதத்துவம் படித்து புரியும் தவம்
மனம் குழப்பி நானும் செய்து வந்தேன்
ஒற்றைக் கேள்வியில் என் தவம் கலைத்தாய்
ஓய்வாக பதிலை தேட வைத்தாய்

தவம் கலைத்த உனக்கு சாபம் இடுவேனோ
தவம் கலைந்தது உன் வரமாக கொள்வேனோ
காட்டுவழி இனி கலங்காமல் செல்வேனோ
கண் திறந்த உன்னை குருவாக கொள்வேனோ

என் தவம் கலைத்து பின் நீ என்ன செய்கிறாய்
என்னுள்ளே அமைதியாய் தவம் செய்கிறாயோ
உன்தவம் கலைக்குமென் சொல் பார்வை எண்ணம்
உன்வழி உள்வழி மறைவழி நிறைவழி என்வழி

தேடுகிறேன்

பல கணங்களாக
பல இடங்களிலே
தேடுகிறேன்
கணங்கள் யுகங்களாக
இடங்கள் உலகங்களாக

தீண்டிய தென்றலை
தோன்றிய காட்சியினை 
தேடுகிறேன்
தென்றலே நினைவாக
காட்சியே வரமாக

கண்டு மறந்த கண்களை
கலங்கி  தெரிந்த நிலவினை
தேடுகிறேன்
கண்களே புதிராக
நிலவே கவிதையாக

அந்தக்கணத்தில் பிறந்தேனா
தொலைந்தேனா தொலைத்தேனா
அந்த இடத்தில் இறந்தேனா
தேடினேனே தேடினாரே 

தென்றலும் நானும் நகர
தீண்டியதா தீண்டினேனா
காட்சியின் அரங்கேற்றம்
அண்டத்திலா பிண்டத்திலா

புதிரின்றும் புதிர்தானா
என்றுமே விளங்காதா
கவிதையே கேள்வியாக
கவிதையே பதில்தர