காதல் விபாசனா

மூச்சையும் இதயத் துடிப்பையும்
கவனித்து நான் படுத்திருக்க

திரும்பிப் படுக்கவேண்டி
தூக்கத்திலும் கவனமாய் எனை நகர்த்த
நான் கண் திறந்து பார்க்க
கலைத்தேனோ தூக்கம் என நீ கேட்க
கலைந்தது தியானமென நான் சொல்ல
குழப்பமும் கலந்து நீ பார்க்க

மூச்சை கவனிப்பதொரு தியானதந்திரா
புத்தமதத்தில் அதன்பெயர் விபாசனா
காலையில் சொல்லவென மனதில் குறித்து

என்மூச்சும் துடிப்பும் கேட்க உனைத்திருப்பி
உள்ளங்கை காதும் விரல்நுனி கண்மூடும்
முத்திரை நான் பிடிக்க நீ மீண்டும் உறங்க

உயிரில் உயிர் கலந்ததென்ற
உன் மூச்சை கவனிப்பதே
நான் செய்யும் தவமாகும்