ஒவ்வொருவரும் எண்ணுகிறார்

ஒவ்வொருவரும் தான் மட்டுமே வாழ்வதாக எண்ணுகிறார்

ஒவ்வொருவரும் தான் மட்டுமே வாழ்வை
ஆழ்ந்து அனுபவிப்பதாக
அனுபவித்து அறிந்ததாக
அறிந்து வாழ்வதாக

ஒவ்வொருவரும் தான் மட்டுமே வாழ்வில்
சரியான முடிவெடுப்பதாக
முடிவெடுப்பது பிறருக்கென
பிறருக்கு உழைப்பதாக

ஒவ்வொருவரும் தான் மட்டுமே வாழ்வின்
பாடங்களை படித்ததாக
அர்த்தம் புரிந்ததாக
இன்பக்கரை கண்டதாக

ஒவ்வொருவரும் தான் மட்டுமே மற்றவரின்
வலிகள் புரிந்தவராக
வலியின் காரணம் தெரிந்தவராக
காரணத்தின் நியாயம் உணர்ந்தவராக

ஒவ்வொருவரும் தான் மட்டுமே மற்றவருக்கு
எது தேவை என்றறிந்தவராக
எது பாடம் என்றுணர்த்துபவராக
எது அன்பு என்று காட்டுபவராக

ஒவ்வொருவரும் தான் மட்டுமே மற்றவரால்
ஏமாற்றப்படுவதாக
துன்பப்படுவதாக
ஞானம் அடைவதாக

சிலர் மட்டும் தான் சும்மா இருந்து
எண்ணங்கள் உயர்த்துமென்றும்
எண்ணங்கள் தாழ்த்துமென்றும்
வாழ்வை மறைக்குமென்றும்  

அறியும் மெய்

இத்தனை பேர் இங்கெதற்கு 

ஏன் இந்த கூச்சல் குழப்பம் 

பதிலில்லா கேள்விகள் அசைபட 

பதிவான நிகழ்வுகள் அரைபட 

வார்த்தைக்கொரு உணர்வு வெளிப்பட

வாழ்க்கை முன்னும்பின்னும் அலைந்திட 

கனவுகள் நிறைந்த அந்த இன்பக்காலம் 

கடவுளை வேண்டல் மட்டும் துன்பக்காலம் 

ஆயத்தங்களையும் பாவனைகளையும் 

வாழ்வு என்றே மனம் ஏற்கிறது 

காலைக்குள் மாற்ற ஒன்றுமில்லை 

கண்மூடி கிடந்தாலும் தூக்கமில்லை 

தாகமோவென தண்ணீர் குடித்து 

சந்தேகத்திற்கு மீண்டும் கழித்து 

அசையாது பிணம்போல கிடந்து பார்த்து 

ஐம்பதிலிருந்து ஒன்று எண்ணிப்பார்த்து 

தள்ளி குப்பற மல்லாக்க சாய்ந்து 

தலையணை தலைகால் இடம் மாற்றி 

ஆயத்தங்களையும் பாவனைகளையும் 

தூக்கம் என்று உடல் ஏற்பதில்லை 

எப்பவுமே இப்படித்தான்

நினைவு தெரிஞ்சபோதிருந்து இருக்குது 

நினைப்பெல்லாம் அதுவேதான் நடத்துது 

போற இடம் தெரியாம போகுது 

பயணமுன்னு தெரியாம நடக்குது 

புதுப்பாதை பார்த்தாலே வியக்குது 

பழையபாதை மாறாம நடக்குது 

போகும்போது விளக்குகளை பார்க்குது 

பாதையிலே வெளிச்சமில்லை தவிக்குது 

விழும்போது பறப்பதாக நினைக்குது 

விழாட்டியும் வலிப்பதாக சொல்லுது 

வழிகாட்டி எங்கேன்னு தேடுது 

வழிகாட்டி நானேன்னும் சொல்லுது 

எவர்வந்து சொன்னாலும் வாங்குது 

எதுக்குன்னு தெரியாம குழம்புது 

நல்லதுன்னு பார்த்ததுமே சொல்லுது 

நின்னு பார்த்து தப்புன்னும் சொல்லுது 

கொஞ்சினால் குழந்தையாக ஆகுது 

கொஞ்சும்போது தாயாக மாறுது 

கரையும்போது கண்ணீரை தள்ளுது 

கல்லாகி கொல்லவும்தான் செய்யுது 

இல்லாம போகணுன்னு நினைக்குது 

இல்லாமை இல்லேன்னும் சொல்லுது 

முழுசாக போகாம கொஞ்சம் நின்னு 

மிச்சமா தவிக்குமோன்னு தயங்குது 

பள்ளத்திலே நிக்குதுன்னு பதறுது 

பரபரன்னு சுத்திமுத்தி பார்க்குது 

கூட்டத்திலே தனியாத்தான் போகுது 

கீழெதுமேலெது தலைகீழ் மரத்திலே 

உன் இடத்தில் உன் கவிதை

கவிதை வழிந்த காகிதம்
காதல் மொழிந்த கவிதை
மனம் எழுந்த காதல்
மாலை விழுந்த மனம்
உடன் கழிந்த மாலை

கண்ணில் காட்டிய காதல்
கண்ணில் தெரிந்த நான்
கண்ணாடி காட்டாத மெருகு
கண்ணாடி பார்க்காத முருகு
கண்சாய்ப்பு பார்த்த நினைவு

தேடல் எல்லாம் நின்றது
ஊடல் சுகமாய் நின்றது
கூடல் மனதில் நின்றது
சாடல் சுற்றி நின்றது
வாடல் பிரிவில் நின்றது

கடன் நம்மை பிரித்ததே
கடல் நம்மை பிரித்ததே
பணம் நம்மை பிரித்ததே
வேலை நம்மை பிரித்ததே
விதி நம்மை பிரித்ததே

இரவு முழுதும் தூக்கமில்லை
போர்வை வாசம் இழக்கவில்லை
பகலில் கூட எழுவதில்லை
நட்பு இப்போ பழக்கமில்லை
அன்னை ஊட்டல் ருசிக்கவில்லை

நித்தம் கையில் காகிதம்
வரமாய் வந்த காகிதம்
வியர்வை பட்ட காகிதம்
கண்ணீர் விழுந்த காகிதம்
காதல் மொழிந்த காகிதம்

உடையும் நான்

சத்தமாக அழுதுகொண்டிருந்தது 

தாயின் கையிலிருந்த குழந்தை 

புன்னகையுடன் கொஞ்சும் தாய் 

புன்னகை பூக்குது எனக்கும் 

யாருடனோ புன்னகை பகிர்வதை 

யாரது தடுப்பது உள்ளிருந்து 

கதறி அழுதுகொண்டிருந்தது 

கையில் குழந்தையுடன் தாய் 

விறைத்துக் கொண்டிருக்கும் குழந்தை 

விளிம்பில் நிற்கும் என் கண்ணீர் 

யாருடனோ கண்ணீர் பகிர்வதை 

யாரது தடுப்பது உள்ளிருந்து 

கண்ணெதிரே சுகதுக்கம் பார்த்தால் 

கண்ணீரோடு பகிரசொல்வதா 

ஊர்முன்னே உணர்ச்சியின்றி உயரே 

உடையாது நிற்க வைப்பதா

இரண்டுமே நான்தானா 

இறுதியில் எதுதான் நான் 

இன்றும் காட்சி நிற்கிறது 

ஏழாம் மாதம் அவசரமாய் வந்துபோன 

ஒருமகனை கையிலேந்தி 

உடையாது நின்றிருந்தேன் 

மண்ணில் புதைக்குமுன்னே 

முதல்முத்தம் தரும்வரையில் 

காதல் விபாசனா

மூச்சையும் இதயத் துடிப்பையும்
கவனித்து நான் படுத்திருக்க

திரும்பிப் படுக்கவேண்டி
தூக்கத்திலும் கவனமாய் எனை நகர்த்த
நான் கண் திறந்து பார்க்க
கலைத்தேனோ தூக்கம் என நீ கேட்க
கலைந்தது தியானமென நான் சொல்ல
குழப்பமும் கலந்து நீ பார்க்க

மூச்சை கவனிப்பதொரு தியானதந்திரா
புத்தமதத்தில் அதன்பெயர் விபாசனா
காலையில் சொல்லவென மனதில் குறித்து

என்மூச்சும் துடிப்பும் கேட்க உனைத்திருப்பி
உள்ளங்கை காதும் விரல்நுனி கண்மூடும்
முத்திரை நான் பிடிக்க நீ மீண்டும் உறங்க

உயிரில் உயிர் கலந்ததென்ற
உன் மூச்சை கவனிப்பதே
நான் செய்யும் தவமாகும் 

எங்கள் நவரசக் காதல் வாழ்வு

நான் காதல் ஜுரம் வந்து தவிக்கையிலே 
நெற்றி தொட்ட நண்பரெல்லாம் நகைக்கையிலே 
நெஞ்சு தொட்ட ஒருத்தி மட்டும் நின்றாளே 


அம்மா அப்பா சொன்னதெல்லாம் குற்றமாக 
அவள் நினைத்து அப்பப்போ அழுகையிலே 
அக்கண்ணீர் துடைக்கும் ஒரே விரலானேன் 


உள்ளங்கள் இணைந்ததென எங்க எண்ணம் 
உடல்பசி அலைதலென சிலர் இழிக்க 
உள்ளே நொறுங்கி நெருங்கலானோம் 


கூடவே இருந்து வந்த நண்பர் சிலர் 
காதலுக்கு குழிபறிக்க மிரண்டு போனோம் 
கடவுளே சாட்சி என கோவில் போனோம் 


திருமணத்தோடு முடிய இது காதல்படமா 
சீர்வரா திருமணத்தால் செலவு அச்சம் 
சிலகாலம் வசதியின்றி வாழ்ந்திருந்தோம் 


கல்யாணம் முடிந்தபின்னே சேரவந்த இரு 
குடும்ப நடத்தையாலே கோபம் கொண்டோம் 
கொண்டவரே போதுமென்று மீண்டும் போனோம் 


கோபம்வரா கணவனென குறிப்பறியும் மனைவியென 
கண்ணுவைச்ச போதெல்லாம் கர்வம் கொண்டோம் 
குழந்தை போல வாழ்ந்து வந்தோம் உள்ளுக்குள்ளே 


காதலுக்கு பரிசாய் வீட்டில் மழலையாச்சு 
குழந்தையோடு குழந்தை சேர உவகையாச்சு 
குடும்பம் கடமை வாழ்விலிப்போ குறியுமாச்சு 


தனிமரமாய் தோன்றி வந்த வாழ்க்கையுமே 
தோப்பாச்சு வீசுதிப்போ அமைதித்தேன்றல் 
தொடருதிப்போ கவிதையாக எங்கள் வாழ்வு

மெரீனா கவிதைகள்

கரையில் கரையுது காகமதன்
கரைதலை கரைத்து ஓங்கும்
கரையில் மோதும் அலைகள்

மணலை தள்ளவந்த நண்டு
பயத்தில் நிற்குது உறைந்து
நகரும் என்னைப் பார்த்து

அசையாது நின்ற போதும்
நண்டு பார்க்குது பயந்து
ஆடைகளை ஆட்டுது காற்று

சிறுவர் பெண்கள் விரும்பிடும்
சதையிழந்த பிணங்கள் அழகு
சங்கு சிப்பி ஓடுகள்

எனைப் பார்த்து அலையாட
அலை பார்த்து நானாட
சிறுவயது நட்பெமக்குள்

மோகம் கொண்டு வந்தவனை
முறைக்க வைக்கும் ஏக்கப்பார்வை
முறுக்கு சுண்டல் பெட்டியுடன்

ஓய்வெடுத்து நிற்கையிலும்
ஒதுங்குவோர்க்கு உதவிடுமே
ஓரம் நிற்கும் படகுகள்

முன்னே மாதிரி இல்லையின்னு
முனகிகிட்டே இருந்தாலும்
மிளகாய் பஜ்ஜி திங்கணுமே

குழந்தையாய் கூட்டி வந்தோம்
குழந்தையாய் தான் ஆடி வந்தான்
கட்டிக் கிடந்தோரை பார்க்கும் வரை

வேடிக்கை வேறு காட்டியும்
விடாது பார்த்திருந்தான்
விரகம் கொண்ட ஜோடியினை

காதலிதுவென கொள்வானோ
குழம்புவானோவென குழம்புகையில்
காவலர் வந்தார் இவர் பிரிந்தார்

குட்டைகுதிரை பட்டம் பொம்மை
குச்சி ஐஸ் மாங்காய் பத்தை
குழந்தையாய் மீண்டும் மாற்றும்

ஒரேபொருளினை எத்தனைபேர் விற்கின்றார்
ஒரேபொருளினை எத்தனைவிதமாய் விற்கின்றார்
அத்தனை பேரிடமும் வாங்க வரும் ஆளுண்டு

ஆடைகளை மடித்துக் கட்டி
ஓடி தப்பப் பார்க்கின்றார்
அலைவென்றதும் மகிழ்கிறார்

என்ன தான் தட்டினாலும்
என்ன தான் உதறினாலும்
என்வீடு வந்துசேரும் மணல்

ஆத்திகம் விற்போர்

தாத்தா படங்காட்டி தினந்தினம் மருந்துவிற்கும்
தெரியாத மருத்துவனும் தெளிவாக தெரிந்திருக்கான்
குழந்தைப் பேறுக்கும் குறைவான ஆண்மைக்கும்
குணமாக்கும் மருந்தேனவே கூவிவித்தால் கோடிவரும்
வசூலை தந்திடாத வியாதிகள் பல இருக்கும்
வியாபாரம் குறையட்டும் விரைவீக்கம் மூலமுண்டு

சொந்தப் படங்காட்டி தெம்பு விற்கும் கூட்டமுண்டு
தெரியாத மனம்மறைத் தரிதார முகங்காட்டும்
கோடீசுவரன் தொப்பையையும் குற்றவுணர்வு குப்பையையும்
களையுமிந்த பயிற்சி என்று கூறினாலே கொடியுண்டு
பெரிய ஆளு சிக்காட்டியும் பணம்பண்ண வழியுமுண்டு
பத்துப்பத்து ரூபாயா லட்சம் பேரிடம் வசூலுண்டு

பிள்ளைகள் இல்லா நேரம் பள்ளியிலே கூட்டம் போடும்
பிரசினை உள்ளவனாய் பாத்துபாத்து புடிச்சி போடும்
கடவுள் வருவான்னும் கேட்டால் பதில் சொல்லும்முன்னும்
கடவுளின் தூதனென்றும் கடவுளே தானென்றும்
பணங்கொடு கடவுளுக்கு பிள்ளை மதிப்பெண் கூடுமுன்னும்
பாவம் போகும் பணம் பெருகுன்னு சொர்க்கத்தில் இடம் விற்கும்

நாத்திக மதம்

கடவுள் படைக்கப்பட்ட போதே நாத்திகன் பிறந்து விட்டான் 

யுகயுகமாய் அவதாரமெடுத்தபோதும்

நாத்திகத்தை அழிக்கவில்லை 

ராமனும் மரியாதையாக 

நாத்திக அந்தணன் என்றான் 

ராமன் காட்டில் வாடும்போது 

நாட்டில் நாத்திகன் வாழ்ந்திருந்தான் 

ராமன் கடவுள் ஆகும்முன்னே 

கடவுள் இல்லை என்றிருந்தான் 

நானும் கூட சில காலம் 

நாத்திகனாய் வாழ்ந்திருந்தும் 

அடையாள சட்டை போட்டு 

அலைந்ததில்லை ஊருக்குள்ளே 

பிறமொழி நாத்திகர்கள் 

பற்றி எனக்கேதும் தெரியாது 

நம்மூரு நாத்திகர்களுடன் 

நல்ல பழக்கமுண்டு 

நாத்திகம் என்றொரு மதமுண்டு 

ஆத்திகனாய் பிறந்துபின் 

நாத்திகனாய் சிலகாலமேனும் 

வாழாதிருப்பவன் பெற்றோரால் 

மூளைசலவையாகி சிந்தியாதவனே 

நாத்திகனாய் பிறந்துபின் 

ஆத்திகனாய் சிலகாலமேனும் 

வாழாதிருப்பவன் பெற்றோரால் 

மூளைசலவையாகி சிந்தியாதவனே 

மத அடையாளம் காட்டும்வண்ணம் 

வண்ண ஆடை உடுத்துவார்கள் 

ராமஜெயம் போல இறந்த தலைவர் 

வாழ்கவென்று கூவி கூடுவார்கள் 

நாத்திக மதத்தில் குருக்களுண்டு மடங்களுண்டு 

உருவாக்கிய தலைவருடன் கூட 

அடுத்த நிலை தலைவர்களையும் 

இருந்தாலும் இறந்தாலும் 

மாலையிட்டு வணங்கிடுவர் 

பிறந்த இறந்த நாள்பார்த்து 

கூட்டம் கூடி ஊர்வலம் போய்

ஊரூராய் திருவிழா நடத்தி 

பக்தரெல்லாம் மகிழ்ந்திருப்பார் 

ஊரூருக்கு மடங்களுண்டு 

ஒவ்வொன்றுக்கும் தலைவருண்டு 

அங்கங்கு சொத்துண்டு வசூலுண்டு

வீணாய் போகும் பக்தருண்டு 

திருமணம் நடத்திவைக்க 

தலைவர் வந்திருந்து அர்ச்சிப்பார் 

தன்மத புனிதர்களை போற்றியும் 

பிறமத புனிதர்களை தூற்றியும் 

நாத்திக மதத்தில் சாதியுண்டு மதமுமுண்டு 

நாத்திக மதத்திலும் 

சாதிசெத்து போவதில்லை

நாத்திக நாக்குகள் 

சாதி சொல்லா நாளுமில்லை 

நாத்திக மதத்திலும் 

உட்பிரிவுகள் பல உண்டு

உட்பிரிவுகளுக்குள் நித்தம் 

சண்டைகளும் வருவதுண்டு 

நாத்திக மதத்திலும் 

தலைவர் சொன்னது வேதமாகும்

அதை அறிந்தால் போதும்  

அனைத்தும் அறிந்தாற்போல் பேசித்திரிவதுண்டு

நாத்திக மதத்திலும் 

மதத் தீவிரவாதமுண்டு 

பிறரை எதிரியென நாவால் தாக்கிடுவர் 

கூட்டம் கூடி உடலாலும் தாக்கிடுவர்