பிறவிகள்

இன்று புதிதாய் பிறந்தேன்
நேற்றும் புதிதாய் பிறந்தேன்
எத்தனை பிறவி பிறந்திளைப்பேன்

சுத்தி

தோல் துவைக்க தினம் நேரமுண்டு
தோல் சொறி தனியாய் உணர்த்தும்
பிராணச் சொறி இயல்பாய் தோன்றிடும்

தொலைத்தாலும்

சின்னதாய் அழகாய் வடிவாய் முன்னே வந்து
சிறு கவனச் சிதறலில் காணாது மறைந்தாலும்
சுகசுகந்த சுவடுடன் மறந்த என்புதுக்கவிதைகள்

சாதி ஒழிக்கும் புதுசமூகநீதி

பலநூறு ஆண்டாய் மூட சாதி முறையால் எம்பரம்பரையை
பழித்தார்கள் இழித்தார்கள் அச்சாதிவெறியர்கள் காலம்மாறி
பலனுக்காக எம்சாதியை உரக்கக்கத்தி அவரை இழித்துப்பழிக்கிறோம்

குழுக்கூட்டம்

கனமான மௌனம் இருமல் செருமல் சிந்தனை பாவனை
கவனமான பார்வைத்தவிர்ப்பு நகம் சுவர் ஆராய்ச்சி
கூடிப்பேச வந்தவர்களின் துவக்கத்திற்கான காத்திருத்தல்

முகங்கள்

எத்தனை முறைநான் எத்தனை முறைநான்

எந்தன் பிம்பம் பார்த்திருப்பேன்

ஒவ்வொரு முறையும் ஒவ்வொரு முறையும்

வெவ்வேறு முகமே தெரிகிறதே

எத்தனை முகங்கள் எத்தனை முகங்கள்

என்னசல் முகம்தான் இதிலெதுவோ

ஒவ்வொரு முகமும் ஒவ்வொரு முகமும்

பிறர்க்கு செய்த முகந்தானே

ஒன்று உன் காலைக்கு ஒன்று உன் மாலைக்கு

ஒன்றுண்டு ஒவ்வொருவர் வேளைக்கும்

ஒன்று உன் உவப்பிற்கு ஒன்று உன் உவர்ப்பிற்கு

ஒன்றுண்டு ஒவ்வொருவர் உணர்விற்கும்

ஒன்று என் உழைப்பிற்கு ஒன்று என் பிழைப்பிற்கு

ஒன்றுண்டு ஒவ்வொரு தொடர்புக்கும்

மீண்டும் பிம்பம் பார்க்க மீண்டும் பிம்பம் பார்க்க

எனக்கென முகமே இருக்காதோ

நீயும் பிம்பம் பார் நீயும் பிம்பம் பார்

உன்முகம் சில நான் பார்த்திருக்கேன்

இந்த என்முகம் இந்த என்முகம்

பார்த்ததுமே நீ கரைந்திடுவாய்

அந்த என்முகம் அந்த என்முகம்

பார்த்ததுமே நீ உறைந்திடுவாய்

ஐயோ அந்தமுகம் ஐயோ இந்தமுகம்

காட்டவே மாட்டேன் நானுனக்கு

உனக்கு அந்தமுகம் உனக்கு இந்தமுகம்

அறிந்திடல்தான் உன்னை புரிந்திடலோ

உந்தன் அந்தமுகம் உந்தன் இந்தமுகம்

பிடித்திடல்தான் உறவு நிலைத்திடலோ

இது ஓருலகம் அது ஓருலகம்

இது பிறந்தது
அது பெற்றது
இது மூன்று
அது முப்பது
இது இளம்விரல்
அது கைகளில்
இது வளருது
அது வளர்க்குது

இது இளஞ்சாரல்
அது பெருங்காற்று
இது இட்டுச்செல்லும்
அது அன்பில்செல்லும்
இது அண்டிச்செல்லும்
அது அழைத்துச்செல்லும்
இது உயரப்போகும்
அது உருகிப்போகும்

இது கடிந்துக் கொள்ளும்
அது சிரித்துக் கொள்ளும்
இது மிரண்டு போகும்
அது மிரட்டிப் பார்க்கும்
இது கசங்கிப்போகும்
அது கசந்துப்பார்க்கும்
இது அதுவன்றி வாழும்
அது இதுவன்றி வாடும்

இது அப்போது
அது இப்போது
இது மலர்ந்தது
அது காய்க்குது
இது அதுவானது
அது இதுவாக்குது
இது பிறந்தது
அது பெற்றது

குமரி

வார்த்தையாலே உரைத்துப்பார்த்தேன்
வார்த்தை வெளுத்துப்போனதே
கவிதையாகக் கோர்த்துப்பார்த்தேன்
கருத்து வழுக்கிப்போனதே
எழுத்தினாலே சொல்லிப்பார்த்தேன்
ஏதும் விளங்கவில்லையே
மௌனமாகக் கேட்டுப்பார்த்தேன்
முகமலர்ந்தாள் குமரியே

சிலுவை

சாய்க்குமோ இதுவென்று
சிறுபிள்ளையாய் நானும்
சுமந்துதிரிந்த தாமிந்த
சிலுவையெனை அறையுமுன்னே
தேவனே இரட்சிப்பீர்

நிஷாவும் வெள்ளையனும்

நிஷா எங்களை எல்லாம் புரட்டி அடித்தது
வெள்ளையனைப் போல வேண்ட வைத்தது
மழையே போ போ வேறொரு நாள் வா வா

கழுதையும் நானும் வேற்றுமை ௭

வீட்டில் வரும் பிரச்சினைக்கு
சகோதரனை குண்டு வைத்து கொல்வேன்

கழுதையும் நானும் வேற்றுமை ௬

என் சகோதரன் மேல் கோபம் வந்தால்
எங்கள் தாயைப் பழிப்பேன்

அனைவருக்கும் சமமாய்

அவனுக்கு எதோ பிரச்சினை போல பாவம்
அவன் கேட்கும் முன்னமே தந்துவிட்டேன்
அவசரமாய் இலவச அறிவுரைகள்

தேசியகீத சந்தந்திற்கு எழுதியது

இறை நிறை வரை இமயம்முதல் இறையே
நில்தவம் செய்மண் வரையே
வாழ்விக்கும் தாயே திருநாடே இறையே
என தினம் போற்றிடு வோமே
இந்தியர் அனைவரும் ஒருதாய் மக்கள்
நாமிதை அறிவோம் நிஜமே
மதம் இனம் ஜாதி என்றே
பலப் பல நம்முள் பங்கும்
என்றும் இதை எதிர்ப்போமே
உழை உயிர் கூட்டினில் நின்றிடும் வரையே
பாரதம் காக்க உழைப்போம்
உழைப்போம் உயர்வோம் ஜெயிப்போம்
சரித் திரத் திலே நிலைப்போம்

நல்நட்புகள்

பல நாள் கழித்து நல்நட்புகள் உறவு
மறைத்தேன் முகத்தை அப்புறம் திருப்பி
துடைத்தேன் துளிர்த்த கண்ணீர் துளி

கவிதைக்கு நேரம்

அமெரிக்கக் கடன்காரன் டாலர் வைத்து ஏமாற்ற
அண்டிப் பிழைத்த எங்காளு நம்மூரில் ஆடிப்போக
வாய்த்தது எனக்கு கவிதை எழுத நேரம்

புதிய கறுப்பர்

அங்கே ஒரு கறுப்பர் ஆட்சியைப் பிடிக்க
நம்மாளு வென்றான் என நம்மாளு மகிழ
தான் கறுப்பன் எனப்புதிதாய் நினைக்கும் மேலடிமைகள்

கூட்டுக்களி

அவரவர் விழைவு அவரவர் போதை அவரவர் கதை
மற்றவர்சொல் காதுள் நுழைந்தும் மனமடையாது
கூடிக்களித்ததாக மறுநாள் அயர்ச்சியில் நினைப்பு

பிரிவு

கடனும் லாபமும் சேர்த்து வளரும்
கணக்கொன்று வாய்த்து நித்தம்
நானெழுதி மகிழ்கையில் இந்த
நரர்க்கெல்லாம் ஏன் வருத்தம்

மற்றக் கடனெல்லாம் தனித்தனியே
மனதைக் கலக்கையிலே உன்னிடம்
பட்டக் கடன் வானைத் தாண்டியும்
பெருமிதம் தருவது ஏன் நித்தம்

எழுதி எழுதி கூட்டிக் கழித்து
எண்களில் குழம்பி காண்பார் லாபத்தை
காகிதத்தில் எண்களில் அடங்கா கணக்கை
கண்டதும் லாபமென்றது ஏன் சித்தம்

மொத்த ஏன்களுக்கும்
முழுதும் ஒருபதில்
மச்சம் என்கிறது
மச்ச சாஸ்திரம்

குயிலுக்கங்கே விடிந்துவிட்டது
கூவியுரைக்குது ஊருக்கெல்லாம்
நீயில்லா எனக்கு மட்டும்
நீள்கிறது இந்த மாலை

கொசுவும் ஒரு தூக்கம் போட்டு
குருதிப்பசியுடன் பறக்குதிங்கே
நினைவில் நீயாட பறக்குதிங்கே
நேரக்கணக்கும் உறக்கமுமே

உடுக்களும் கண்சிமிட்டி ஓய்ந்து
ஒளியப்பார்க்குது வானில் எங்கோ
கண்மட்டும் வானை வெறிக்க
காணுது மனம் உன்னை மட்டும்

சூரியனும் தூக்கம் முடிந்து
சிவப்பாய் கீழே எழ
கண்ணிரண்டும் சிவந்து நானும்
களைத்து எழுந்தேன் உறங்காமல்

காதலலை மனசைத் தாக்க குலைந்து
காகிதத்தில் வடிக்க எண்ணி எழுதி
சரியா என்று படித்துப் பார்த்தால்
சாரல் மட்டும் தெளிச்சிருக்கு

மனதிலுள்ள உணர்ச்சி எல்லாம்
வாயால் சொல்ல முயற்சி செய்ய
ஓய்ந்தது வாய் சொச்சம் சொல்லி
ஒளிந்திருக்கு பனிப்பாறை மிச்சம் உள்ளே

பிரிந்திருக்கும் இந்த நேரம்
பாரமாகி அழுத்தும் மனம்
புரிய வைத்தது ஒரு நிஜம்
பூரணமாய் உள்ளே உள்ளாய்

யுகங்கள் பிரிந்தால் வருடங்கள்
வருடங்கள் பிரிந்தால் நாட்கள்
நாட்கள் பிரிந்தால் வினாடிகள்
நாம்பிரிந்தால் வினாடி யுகங்கள்

கோடைப் பெருமூச்சு

நிற்கும் மரமெல்லாம்
நீர்விழுது விட
அலையும் மேகமெல்லாம்
ஆனந்த நீர்சொரிய
கொடிசெடி மரமெல்லாம்
கோடை அழுக்கைக் கழுவி
புத்துணர்வு கொண்டு
புதுப் பச்சை இலைவிட
உடல் குளிருடன்
உள்ளம் தினவெடுத்து
கவிதை பலபாடிடும்
கார்கால நினைவுடன்
வாட்டும் கோடையின்
வெய்யில் அனலின்
வெப்பம் தாளாது
வியர்வையில் நனைந்தமேனி
பழம்நினைவினால் வந்த
பெருமூச்சால் காய்கிறது

சகோதரனே

சகோதரனே
துன்பத்தில் இருக்கலாம் நீ
சோகத்தில் மிதக்கலாம் நீ
துன்பத்தையும் சோகத்தையும்
நினைப்பதால் மட்டும்
நீங்கிடுமா அவை

அடியெடுத்து வைக்குமுன்னே
அவ்விடத்தை நீபார்
அடியெடுத்து வைத்தபின்னே
அடுத்த இடம் பார்

அடியெடுத்து வைத்தபின்னும்
அவ்விடத்தைப் பார்த்திருந்தால்
அடுத்த அடி எப்போது
அப்படியே நிற்பாயே

புதுகவிகளுள் சிலர்
புலம்பலையே சொத்தாக
பேணிவருதல் போல
பேதையாய் மாறிடாதே

கண்ணிலே நீர்வந்தால்
காண்பாயோ பாதையை
கடல்நீர் உப்பிருக்க
கண்ணீர் உப்பெதற்கு

கண்ணீர் இனிவேண்டா
கவலைகள் இனிவேண்டா
குன்றுகளைத் தகர்த்து
குழிகளை நிரப்பிடுவோம்

குழிகள் பலயிருக்க
குன்றுகள் எதற்கு
குன்றினுச்சியில் நின்று
குழிகளை எண்ணவோ

கனல்வார்த்தைகள் பல
காதில் விழுந்தால் போதுமா
குறட்டைவிடும் அறிவினை
கொளுத்தித்தான் பாரேன்

சுடர் விட்டெரியும்
சூடு எங்கும் பரவும்
சுறுசுறுப்பாய் புதுக்குருதி
சுருதியுடன் பாயும்

மூளைக்குள்ளே ஆயுதம்பல
முடங்கியதை அறிவாய்
மேகமென நீஎழுந்து
மேருவையே தகர்ப்பாய்

பழையதென்றும் புளிக்கும்
புதியதுதான் இனிக்கும்
பழையதை மறந்து
புதுவாழ்வு துவங்கிடு

என் பிரியமுள்ள எதிரிகளே

அன்புள்ள
மென்மையான இரக்கமற்றோரே
பிரியமுள்ள எதிரிகளே எனை
வெறுத்தொதுக்கும் நண்பர்களே

நான்
அனிச்சம் போன்றவன்
விருந்தினனாக இருக்கையில் மட்டுமல்ல
விருநதளிக்கையிலும் தன்

என்னிதய மலரை சிலர்
கொள்ளிகட்டையால் போசுக்குகின்றனர்
கொடுமைக்காரர்கள்
ஆனால்
நீங்கள் மென்மையானவராயிற்றே
அதனால் தான்
மணம் வீசும் ஊதுபத்தி
முனைகொண்டு முத்தமிடுகின்றீர்

நான் செல்லும் பாதை
காட்டுப்பாதை
பலர் என்பாதை முட்களை
கண்டும் காணாது போகின்றனர்
ஆனால்
நீங்கள் என் பிரியமுள்ளவராயிற்றே
அதனால் தான்
ரோஜா செடிஎடுத்து
மலரை பறித்துவிட்டு
மீதியை பாதையில் வீசுகின்றீர்

நான் போரிடும் களத்தில்
பலர் முன்னின்று குத்துகின்றனர்
வீர எதிரிகள்
ஆனால்
நீங்கள் என் நண்பராயிற்றே
அதனால் தான்
என்மார்பு வலிக்குமென்று
பின்னின்று குத்துகின்றீர்

நீங்கள் தந்த அனுபவங்களுக்கு
நன்றிகள் பலகோடி

கழுதையும் நானும் வேற்றுமை ௫

அந்தப்பெண் மேல் மோகம் வந்தால்
அந்தப்பெண்ணே அறியாவாறும் மறைப்பேன்

தமிழனும் தமிழும்

கபடநாடக நடிக துதிஇசை வித்வான்
பொய்யுரை பச்சை தமிழர் எத்தனை பேர்
சமயமற்ற தமிழ் படிப்பதன் பலனோ

குற்ற விரயம்

தமிழ் வாலிப வயோதிக அன்பர்கள் ஒருபுறம்
தெய்வமாக்கப்படும் தமிழ் பெண்கள் மறுபுறம்
மாநகர பேருந்தில் நிமிட ஈர பலாத்காரங்கள்

தேடல்

உன்னை அறிவதற்கு முன்பே தேவையால் தேடுறேன்
மனதாலும் செயலாலும் எத்தனை ஏற்பாடுகள்
நீயே என் கடவுள் ஆகி விடுவாயோ

முதலும் முடிவும் ஒன்றோ

கட்டிடங்கள் குடிசைகள் பாடசாலை சாலைகள்
முதல் போலவே முடிவும் தெரிய
மின்வண்டி நிலையங்கள் எல்லாம் ஒரேமாதிரிதான்

கழுதையும் நானும் ஒற்றுமை ௨

இன்னொரு கழுதை இறந்தா பக்கம் நின்று
அடுத்த வேலை வரும்வரை எண்ணம் பரப்பும்

கழுதையும் நானும் ஒற்றுமை ௧

என் குழந்தை அழும்போது
ஓடிச்சென்று பார்த்திடுவேன்

கழுதையும் நானும் வேற்றுமை ௪

பிள்ளை வெறுத்தாலும் நல்ல வரனென்று
தேடித்தேடி கட்டிவைத்தழிப்பேன்

துளி மரணம்

துளி விஷம் தரும் துளி மரணம்
மரணமும் நல்லனுபவம் என காட்டுதோ
வெளியில் இருந்து உள் செல்லும் போதை

நிலையாமை

சூரியனை பார்க்க முடியவில்லை என்னால்
சந்திரன் பார்க்க அழகு சொல்லவோ
மாறச்சொல்லி வறுப்பதும் ஏனோ

கிரகங்கள்

வான் கிரகங்கள் ஒன்று சேர்ந்தால் சூரிய குடும்பம்
எங்க கிரகங்கள் ஒன்று சேர்ந்தால் பெரிய குடும்பம்
ஒரு மேடையில் நின்றாலும் ஒவ்வொரு திசை பார்க்கும்

செதுக்கல்கள்

நூற்றைம்பது ஆண்டுகளாய் மனிதன் செதுக்கினான்
ஆயிரத்தைநூறு ஆண்டுகளாய் இயற்கை செதுக்கியது
மகாபலிபுரச்சிற்ப அழகே அழகு

கொண்டு வந்ததை கொண்டு போ

நீ என் நண்பனா பகைவனா
கொண்டு வந்ததை கொண்டு போ
காற்றே அந்தமேகம் மறைக்குதென்நிலவை

கழுதையும் நானும் வேற்றுமை ௩

கடவுள் உணர்வு இல்லாவிடினும்
கடவுள் பற்றி மாய்வேன்

கழுதையும் நானும் வேற்றுமை ௨

வளர்ந்த பிள்ளையை மாற்றானாய்
எட்டி உதைக்க மாட்டேன்

கழுதையும் நானும் வேற்றுமை ௧

பணத்துக்குகாகவும் மனத்துக்காகவும்
மணிக்கணக்காய்இயற்கைக்கு எதிராயுழைப்பேன்

Mudhal Murayai

எத்தனை நாள் யோசித்திருந்தேன் ...
இத்தனை சுலபம் என அறியாது ...
நானும் blog எழுதுறேன் ...

மனதில் தோன்றியதை எழுதி ஒரு விதமாய் லேபல் ஒட்டி தருவேன்

கழுதை என்று திட்டு வாங்காத தமிழன், தமிழ்நாட்டில் வளர்ந்திருக்க முடியாது. அதனால் நான் மனிதனுக்கும், மிருகத்திற்கும் இடையே காணும் வேற்றுமை ஒற்றுமைகளை, கழுதையையும் என்னையும் ஒப்பிட்டு எழுதுவேன்.

Punctuation marks எதுவும் எந்த போஸ்டிலும் இருக்காது. அவரவர் தமிழறிவிற்கேற்ப குறிகளால் பிரியாத தமிழ் வார்த்தைகளை பலவாறு கோர்த்து விளையாடும் தமிழ்விளையாட்டு கெட்டுவிடும் என நினைக்கிறேன்.

போதனை எதுவும் இருக்காது (மாணவப் பருவத்தில் தோன்றியதைத்தவிர). என் அனுபவங்கள், கேள்விகள், வடுக்கள் போன்றவற்றை என்காட்டுத்தமிழ்தேன் தடவி பகிர்ந்து கொள்வேன். நீங்களும் தயவு செய்து உங்கள் பதில்களையும், எண்ணங்களையும் பதிவு செய்யுங்கள்.

கல்தோன்றி மண்தோன்றா காலத்திலிருந்து தமிழ் வாழ்ந்து கொண்டிருக்கிறது...
தமிழ் அதுவாய் வாழும்
முடிந்தால் தமிழால் வாழ்வோம்