முகங்கள்

எத்தனை முறைநான் எத்தனை முறைநான்

எந்தன் பிம்பம் பார்த்திருப்பேன்

ஒவ்வொரு முறையும் ஒவ்வொரு முறையும்

வெவ்வேறு முகமே தெரிகிறதே

எத்தனை முகங்கள் எத்தனை முகங்கள்

என்னசல் முகம்தான் இதிலெதுவோ

ஒவ்வொரு முகமும் ஒவ்வொரு முகமும்

பிறர்க்கு செய்த முகந்தானே

ஒன்று உன் காலைக்கு ஒன்று உன் மாலைக்கு

ஒன்றுண்டு ஒவ்வொருவர் வேளைக்கும்

ஒன்று உன் உவப்பிற்கு ஒன்று உன் உவர்ப்பிற்கு

ஒன்றுண்டு ஒவ்வொருவர் உணர்விற்கும்

ஒன்று என் உழைப்பிற்கு ஒன்று என் பிழைப்பிற்கு

ஒன்றுண்டு ஒவ்வொரு தொடர்புக்கும்

மீண்டும் பிம்பம் பார்க்க மீண்டும் பிம்பம் பார்க்க

எனக்கென முகமே இருக்காதோ

நீயும் பிம்பம் பார் நீயும் பிம்பம் பார்

உன்முகம் சில நான் பார்த்திருக்கேன்

இந்த என்முகம் இந்த என்முகம்

பார்த்ததுமே நீ கரைந்திடுவாய்

அந்த என்முகம் அந்த என்முகம்

பார்த்ததுமே நீ உறைந்திடுவாய்

ஐயோ அந்தமுகம் ஐயோ இந்தமுகம்

காட்டவே மாட்டேன் நானுனக்கு

உனக்கு அந்தமுகம் உனக்கு இந்தமுகம்

அறிந்திடல்தான் உன்னை புரிந்திடலோ

உந்தன் அந்தமுகம் உந்தன் இந்தமுகம்

பிடித்திடல்தான் உறவு நிலைத்திடலோ